Alter schützt vor Torheit nicht

von Willi Matzke

Schunn ann ganze Reihe voo Juhrn seins haar, doo labta uba im Gebärge ei enn unn dammsalba Hause zwee Leute die beede nimme jung woarn. Derr Moan hieß Ehrenfried, woar Witwer unn baal siebzig Juhre, unn die Frau hieß Ernestine, woar ann aale Jungfer, unn hoatte die fuffzig überschrieta. Die eegentlicha Zunoama troan nischt bei derr Sache bei, denn heute nooch warn viele Leute wissa, war die zwee Geister woarn. Eegentlich woarn sie nooch beede a bissel miteinander verwandt, äben wie ma su früher soarte, ihre Grußeltern hoatta amool die Pelze nabaeinander hänga gehoot.

Beede Leute hoatta jeder ann kleene Rente unn labta recht unn schlecht dohie, oaber jedes hübsch für siech, denn jedes hoatte ei damm Hause seine Stube. Weil oaber blußig eene Küche vurhanda woar, kochta sich beede getrennt ihr bissel Assa durt drinne.

Vo vurnerei muuß oaber gesoart warn, beede hoatta ihrn Koop für sich, unns woarn a poar hoarte Schadel, wie doas öftersch bei aala Leuta su derr Foall ies. Ann lange Zeit hoatta sich beede ganz gutt verstanda, oaber immer sullts nich suu bleiba.

Ehrenfried, uff gutt schlesisch Irmfried, hoatte nooch Frühlingsgedanka. Die Leute meenta, ies möchte wull derr zweete Trieb sein, unn su finga oo öftersch im die Anstine rimm zu scharwenzeln. Endlich meenta, nee Anstine, eentlich könnta mir doch da Kroam zusomma schmeißa, zu woas muuß denn jeder voo ins extra kocha, woascha unnsuwetter. Oaber a foand wenig Gehier. Nuu versuchtas mit Uufmerksamkeeta. Zerr Kirms keefta`r doas grieste ann schinnste Pfafferkuchahaza mit da Uffschrieft – Aus Liebe - , vumm Woarmboader Tollsackmoarkt bruchta`r da schinnsta Tollsack unn die besta Pauerbissa miet, die ar extra bemm Hubrich-Bäcker hullte. Viel viel anderes toat a nooch, oaber au nischte zug, denn sua aales Hatze voo ieber fufzig Juhrn weech zu kriega, maag nee su eefach sein.

A ploante schunn lange su eene Oart Onkelehe, unn eenes Taags machta au ihr da Vurschlaag. Oaber nee, nee, sie woar nich eiverstanda und meente, bei ihrn Aalder tät sie nee nooch etwa mit klenn Kindan ofanga, woas wärn och doo die Leute soan. Hätte sie, wie sie jung woar, kenn Moan gekriecht, su welle se eben oals aale Jumpfer starba. Irmfried kunnte doas nee verstiehn, unn eenes Taages foanda ei enn Buche a kleenes Gedichte doas fing su oan:

Vergiß mich nicht, Du gute reine Seele

und schließ mich in Dein Herze ein,

zu zwei´n ist schöner wie alleene

und Du wirst froh und glücklich sein.

Glei schnieta da Reim aus, unn wie Anstine Geburtstag hoatte, ließa an gruußa Streeselkucha backa, toat da Ausschniet druuf unn ging zu ihr ei die Stube „um ihr sei Geschenk zu überbrenga. Jitzt duchte er, ies wär geschofft.

Bemm Koaffee plauderta sie beede lange, oaber woas - - hoat niemand je gehurrt. Jedenfoalls a andan Tag wiea amool aus damm Goarta zurück ei seine Stube koam, stoand da Kucha wieder uff semm Tische. Unn nu ging die Feinschoaft luuß. Voo damm Taage oa grüßta se sich nimme, jeder kochte jitzt ei senner Stube. Hoatte se Wäsche unn sie hing ihre Underwäsche naus, hing ar seine dicht derrnaba, oaber er machtes su, doas stes zerrißnes dreckiches Zeug doo hing, doamit die Leute denka sullta, sie hätta sulcha Plunder.

Anstine kochte ferr Wuut, destomehr freete er sich, unn mehr oals eemool oam Taage sunga jitzt doas Lied „Als alte Jungfer sterben, das muß doch schrecklich sein“.

Anstine wurde oalle Taage fuchtiger, sugoar Irmfrieds Hoahn, beede hielda sich a poar Hühner, hieß sie a Hurenluder, wenna amoal zu ihrn Hühnan koam, obwuul se früher fruh woar, doaß se sich kenn haaln brauchte, weil er ann sulcha hoatte.

Su ging doas Geplänkel über ee Juhr lang, woas se einander groade zum Pussa tun kunnda, doaß toata sie oalle beede.

Da enn Taag oaber wurda sie beede handgreiflich. Irmfried packte Anstine beia Looda, und die nich zu faul, ihn bei semm ruta Vuulboarte. Geschrien hoan beede wiea gestochnes Schwein. Endlich koama a poar Nupperschleute, oaber au die schoffta nischte. Sie mußta erscht ann Emer kahles Woasser hulln unn über die Hitzköppe gießa, ehe se sich luus ließa. Nooch vielemoole hooan sie sich gepackt, unn Irmfrieds Hitze woar wull doch awing oabgekühlt, denn eenes schienen Taages zuga aus. Zwee Juhre druuf stoarb die Anstine, Irmfried oaber ließ es sich nee nahma, a ging mit zu Groaba unn bruchte sugoar ann recht grußa Kranz mit. Au später hoana die Leute nooch moanchmool bei ihrn Groabe gesahn.

Aus „Schles.Bergwacht“, SB1957/N07/S113